الضفة الغربية حالة الطقس

مجرد رأي .. بقلم الكوميديان علاء أبو دياب

مجرد رأي .. بقلم الكوميديان علاء أبو دياب

03:29

2020-04-02

الله لا يحط حدا بموقع مسؤولية بهيك فترة، كل حكومات العالم تحت ضغط حالياً.. بس الحكومات التعبانة شعبياً وضعها أصعب، لأنها ما بتقدر تحكي الحقيقة وتخلي الشعب يتحمل معها المسؤولية، وبحاولوا يبينوا انهم عظيمين وأحسن من أحسن دولة بالعالم، وهاي اللحظة اللي شعوبهم عرفت فيها قيمتهم.. ولكن اليكم بعض الحقائق:

الأزمة الإقتصادية رح تقتل أعداد أكبر من الكورونا..

الأزمة الإقتصادية اللي مرشحة تصير كساد.. معناها انو مش رح نلاقي ناكل، هاي الحملات اللي بنعملها اليوم للفقراء مش رح تلاقي حد يتبرعلها..

الحكومات اليوم بتقترض من البنوك عشان تغطي هاي الفترة، كمان شوي اذا بستمر الكساد حتى البنوك بتفلس..

دول غنية وعظمى بدها ترجع تفتح عشان ما تنهار وتصير الناس تموت جوع..

نموذج كأراضي السلطة، أهم مصدر دخل عندها هو العمال.. العمال بدخلوا اكتر من مليار شيكل بالشهر.. (حوالي300 مليون دولار).. هادا الكاش اللي بفوت عالبلد وبتحرك وبحرك الاقتصاد وبعمل ضرايب وبصرف عالكل..

احنا مش دولة بتصدر.. هاي اهم صادراتنا: قوة العمل.. بنبيعها وبنعيش منها..

بالتالي، قرار زي انو السلطة تمنع العمال، معناه انو نشحد.. والقصة مش اسبوعين زي ما بتفكروا.. والعامل بصرفش ع حاله.. العامل بصرف عليك انت كمان.. معاشك من شركتك ومعاشك من السلطة ومعاشك من بنكك ومعاشك من المدرسة الخاصة، كله من الكاش اللي بضخوه العمال بالبلد واحنا بنضل نحركه ونقتطع منه ضرائب نرجع نصرفها معاشات وبنى تحتية ومستلزمات صحة وخلافه، لحد ما نصرفه كله ثمن اشياء بنستوردها من بره، زي الاكل والشرب والملابس والسيارات والدخان والمحروقات وغيره..

تخيل البلد بيت واحد، وكل حدا فيكم ببيع للتاني خدمات، انت واخوانك وامك.. وبتشتروا اللي بلزمكم من بره البيت.. وبس ابوكم اللي بشتغل بره البيت وبجيب مصاري من بره، وتقولوله: اقعد بالبيت زينا، ما هينا كلنا قاعدين.. شهر زمان ببطل معكم حق البصل!

واللي بفكر انو ما حدا بموت من الجوع، يجرب اليوم، قبل الأزمة العالمية ما تشتد، يجيب من اي دولة تبرع شاحنة قمح بس! وحدة بدناش اكتر.. فش حدا فاضيلنا عمي.. الولايات باميركا بنافسوا بعض على جهاز التنفس..

طب شو الحل: الحل انو نلاقي حل عملي وواقعي وما ننسخ حلول الدول الغنية.. كل بلد اله ظرفه، وهاي الحكومة اللي بتهللولها وحاملينها عالاكتاف، رح تاكلوها بس تجوعوا..

خلينا ننزل عالأرض ونعرف حقيقة وضعنا ونفكر بحل واقعي يلائمنا.. بدنا نفكر بحلول ابداعية، واهم اشي حلول بتقدر تصمد اكتر من اسبوعين..

وشكراً