الضفة الغربية حالة الطقس

الناشط رازي نابلس .. القانون العشائري والثار والقتل

الناشط رازي نابلس .. القانون العشائري والثار والقتل

05:02

2020-08-09

قبل فترة قصيرة كثير، في وحش قتل خطيبته وتركها في السيّارة بمنطقة بيتونيا برام الله. امبارح، قعدوا مجموعة زلام، ذكور، واتفقوا ع السعر: 100 ألف دينار ديّة. وبتعرفوا ؟ دايمًا، كنّا نقول إنّه الظلم، بحق النساء، هو ثقافة مجتمعيّة بتشوف المرأة كجزء من أملاك الرجل وهاي هي المصيبة الحقيقيّة. بس شو اللي صار هاي المرّة أكثر ؟ حدّدوا سعر الملك، 100 ألف دينار، زي سعر أي سيّارة سبورت غالية بركبها شاب برام الله ولّا الناصرة ولّا حيفا، زي سعر بيت برام الله، زي سعر فيلا بأريحا، زي سعر أي إشي ثاني، الهدف من تملّكه هو مجرّد المتعة والتملّك ذاته. والإشي كثير بوجّع، الإشي كثير ظالم، بتقولوا خلّصنا العبوديّة ؟ إحنا نص مجتمعنا عبيد، كُل مرأة بهذا المجتمع الظالم، مجتمع الزلام، بتعيش العبوديّة بأوسخ صورها: بتشتريها بمهر، بتنقلها من مسؤولية أهلها لمسؤوليّة زوجها، ولمّا يقتلها (متأسّف بس يخرّبها بلغة التملّك) بتدفعه حقها، 100 ألف دينار أردنيّ.


صعبة نسمع هيك حكي ؟ هاي الحقيقة، وهي بالضبط هيك، النساء أملاك للذكور بهاي البلد. وعارفين وين المصيبة ؟ الناس اللي بتخيّر بين القانون العشائري، وبين القتل والثأر وإنّه القانون العشائريّ بيمنع قتل وثأر. هذا مش صحيح، هذا كذب، القانون العشائري هذا ما بمنع إشي، بالعكس ممكن يخلّيك تصير أزعر وحرامي وتاجر مخدّرات انت وكُل أهلك عشان تجيب المصاري، وتكمّل تقتل، وتكمّل تدفع. وبما إنّه القانون العشائري قانون القويّ، فلمّا تصير تقدر تقتل أكثر، بتقتل الشيخ، وبتصير شيخ، وبتعمل عشيرة، وبتوخذ القانون. شو بدنا ؟ بدنا عدالة، عدالة، عدالة، عيدها مليون مرّة. آه، بدنا عدالة، فيها اللي قتل الإنسانة، بيقضّي عمره بالسجن كلّه. بيروح لحاله، بدون ما أهله يتحمّلوا، وبقعد بالسجن لحد ما يموت. بس هذا ؟ إنّه صلح عشائري ومصاري حق دم الإنسانة، هاي تجارة.


100 ألف دينار، حقها. هيك، بس هيك. إحنا كُنا غلط، وتخيّرنيش ما بين الحكم العشائري والثأر والدم والموت، الاثنين بدّيش اياهم، لا بدّي ثأر ولا دم ولا بدّي حكم مصاريّ، بدنا عدالة. والعدالة، بتيجي بس من نظام عادل، من إنّه الوحش ما يفكّر إنها المرأة إله ملك، ولا أبوها يفكّر إله ملك. العدالة بتبلّش من لحظة ما تعرف إنّه الإنسان حُر، الإنسان إنسان، الروح هي روح بتوكل وبتشرب وبتجرّب وبتغلط وبتعمل الصح وبتتعلّم وبتشعر وبتبكي وبتحب وبتكره وبتتعب وبترتاح وبتفكّر، وهاي الروح مش ملك حدا، هاي الروح ملك ذاتها...


بوجّع، بخزي قد ما بوجّع، 100 ألف دينار أو دم وثأر. لأ، في حل ثالث، سجن القاتل كُل عمره والبراءة منه من أهله وبلده ومجتمعه...